ఆయనో పెద్ద పాలేరు.. మహిళా నేత ఘాటు వ్యాఖ్యలు
టీఆర్‌ఎస్ ఎమ్మెల్సీ అభ్యర్థి పల్లా రాజేశ్వర్ రెడ్డి ఆరేళ్లు ఏంచేశారని మహిళా నేత మండిపడ్డారు. ఉద్యోగాలు పోయి వీధిన పడ్డామని చెప్పినా పట్టించుకోని పల్లా.. ఓటెలా అడుగుతున్నారని ప్రశ్నించారు.
ఎమ్మెల్సీ ఎన్నికలు సమీపిస్తుండడంతో తెలంగాణ రాజకీయాలు హీటెక్కాయి. అభ్యర్థుల గెలుపే లక్ష్యంగా పార్టీలు ప్రచారంలో దూకుడుపెంచాయి. ప్రత్యర్థులపై మాటల తూటాలు ఎక్కుపెడుతున్నాయి. నల్గొండ ఖమ్మం వరంగల్ పట్టభద్రుల నియోజకవర్గ అభ్యర్థిగా పోటీ చేస్తున్న టీఆర్‌ఎస్ అభ్యర్థి పల్లా రాజేశ్వర్ రెడ్డి ఏ మొఖం పెట్టుకుని ఓటడుగుతున్నారంటూ మహిళా నేత, యువ తెలంగాణ పార్టీ అభ్యర్థి రాణి రుద్రమ రెడ్డి విమర్శించారు.
కరోనా కాలంలో ప్రైవేటు ఉపాధ్యాయులు, ఉద్యోగులు వీధిన పడినా పట్టించుకోని పల్లా.. ఇప్పుడు ఓటెలా అడుగుతున్నారని ఆమె ప్రశ్నించారు. ఆరేళ్లు ఎమ్మెల్సీగా ఉన్న పల్లా ఏం చేశారని ఆమె ప్రశ్నించారు. గతంలో ఎమ్మెల్సీగా గెలిపిస్తే ప్రజా సయస్యల పరిష్కారం కోసం కాకుండా ప్రగతి భవన్‌లో పెద్ద పాలేరుగా పనిచేశారంటూ రాణీరుద్రమ ఘాటు వ్యాఖ్యలు చేశారు. మహబూబాబాద్ జిల్లాలో ఆమె విస్తృత ప్రచారం నిర్వహించిన ఆమె అధికార పార్టీ నేతలపై ఓ రేంజ్‌లో ఫైర్ అయ్యారు. తెలంగాణలో ఉద్యోగాల రగడపై ఆమె ఘాటుగా స్పందించారు. సవాల్ విసిరిన మంత్రి కేటీఆర్.. మస్తు ఉద్యోగాలిచ్చామంటూ కేవలం లేఖ విడుదల చేశారని ఎద్దేవా చేశారు.
